తూప్రాన్ గురుకులంలో విద్యార్థుల మధ్య ఘర్షణ

మెదక్ జిల్లా తూప్రాన్ బాలుర గురుకులంలో విద్యార్థులు విచక్షణా రహితంగా కొట్టుకున్నారు. ఆదివారం అర్థరాత్రి 12.00 గంటలకు తొమ్మిదో తరగతి విద్యార్థులపై టెన్త్ క్లాస్ విద్యార్థులు ముకుమ్మడి దాడి చేసి చితకబాదారు. నోట్లో గుడ్డలు కుక్కి, రాడ్లతో కొట్టారు. ఈ విషయాన్ని 9వ తరగతి విద్యార్థులు.. తమ పేరెంట్స్ తెలిపారు. సోమవారం ఉదయం విద్యార్థుల తల్లిదండ్రులు రెసిడెన్షియల పాఠశాలకు చేరుకుని...ప్రిన్సిపాల్‌ నిలదీశారు. పాఠశాలలో ప్రిన్సిపాల్, ఉపాధ్యాయులు సరైన పర్యవేక్షణ లేదని విద్యార్థుల తల్లిదండ్రులు ఈ సందర్బంగా ఆరోపించారు. గతంలో కుడా ఈ తరహా గోడవలు జరిగాయని ఆందోళన వ్యక్తం చేశారు. ఇటీవల 10వ తరగతి విద్యార్థులపై కాలేజీ విద్యార్థులు దాడి చేసిన సంగతి తెలిసిందే. ఆ కొద్ది రోజులకే మరోసారి గురుకుల పాఠశాలలో ఘర్షణ చోటు చేసుకోవడంపై విద్యార్థుల తల్లిదండ్రులు తీవ్ర ఆగ్రహం వ్యక్తం చేస్తున్నారు.

గత జులైలో గురుకుల పాఠశాలలో జూనియర్లను గదిలో బంధించి వారిపై సీనియర్లు దాడి చేశారు. ఈ దాడిలో ముగ్గురు విద్యార్థులు తీవ్రంగా గాయపడ్డారు. విద్యార్థులు బట్టలు ఉతుక్కునే సమయంలో చోటు చేసుకున్న స్వల్ప వివాదం కాస్తా ఇలా ఘర్షణలకు దారి తీస్తుందని పలువురు విద్యార్ధులు పేర్కొంటున్నారు. గురుకులంలో వార్డెన్ల నిర్లక్ష్య వైఖరి కూడా ఈ తరహా ఘటనలకు కారణమని ఆరోపణలు సైతం వెల్లువెత్తుతున్నాయి. అనేక సందర్బంలో గురుకులంలో విద్యార్థులు మూకుమ్మడిగా దాడి చేసుకుని ప్రాణాలు కోల్పోయిన ఘటనలు ఉన్నాయి. అసలే అరకొర వసతులతో ఇబ్బందులు పడుతున్న స్టూడెంట్స్ ఈ గొడవలతో ఆవేదన వ్యక్తం చేస్తున్నారు.