నిరుద్యోగ భృతి ఏమైంది? జాబ్‌ క్యాలెండర్‌ విడుదల ఎప్పుడు?: కిషన్‌రెడ్డి

సీఎం రేవంత్‌రెడ్డి జాబ్‌ క్యాలెండర్‌ విషయమే మరిచిపోయారని, నిరుద్యోగ భృతి ఇస్తామని కాంగ్రెస్‌ పార్టీ మోసం చేసిందని కేంద్రమంత్రి కిషన్‌రెడ్డి విమర్శించారు.హైదరాబాద్‌ లోని ధర్నా చౌక్‌లో బీజేపీ యువమోర్చా ఆధ్వర్యంలో నిర్వహించిన నిరుద్యోగ మహా ధర్నాలో ఆయన పాల్గొన్నారు. ఈ సందర్భంగా ఆయన మాట్లాడుతూ.. కాంగ్రెస్‌ ఎన్నికలకు ముందు ఇచ్చిన హామీలన్నీ విస్మరించి అధికారంలో వచ్చాక ప్రజా వ్యతిరేకతను మూటగట్టుకున్నదని విమర్శించారు.

గ్రూప్‌-1 మెయిన్స్‌కు 1:50 కాకుండా 1:100 నిష్పత్తిలో ఎంపిక చేయాలని డిమాండ్‌ చేశారు. అలాగే రేవంత్‌ రెడ్డి హామీ ఇచ్చినట్లుగా గ్రూప్‌-2 783 పోస్టులను 2000లకు, గ్రూప్‌-3 1365 పోస్టులను 3000లకు పెంచాలన్నారు. మెగా డీఎస్సీలో భాగంగా 25 వేల ఉద్యోగాలను భర్తీ చేయాలన్నారు. నిరుద్యోగులకు వెంటనే రూ. 4 వేల భృతి విడుదల చేయాలని డిమాండ్‌ చేశారు. నిరుద్యోగులకు ఇచ్చిన హామీ మేరకు ఏడాదిలో 2 లక్షల ఉద్యోగాల భర్తీ ప్రక్రియన వెంటనే చేపట్టాలన్నారు.

కాంగ్రెస్‌ నేతలు ఎవరికి దొరికినంత వారు దోచుకుంటున్నారని, రాష్ట్రంలో అవినీతి బాగా పెరిగిపోయిందని ఆరోపించారు. కాంగ్రెస్‌ తెస్తామన్న మార్పు రాలేదు కాని అధికారాన్ని దుర్వినియోగం చేయడంలో మాత్రమే మార్పు వచ్చిందని ఆయన దుయ్యబట్టారు.