మిస్సైల్స్‌, డ్రోన్లతో కీవ్‌పై రష్యా భీకర దాడి

రష్యా దాడులను సమర్థవంతంగా తిప్పికొట్టేందుకు పాశ్చాత్య దేశాల నుంచి ఉక్రెయిన్‌ అందుకున్న ఎఫ్‌-16 యుద్ధ విమానాల్లో ఒకదానిని పుతిన్‌ సేనలు పేల్చివేశాయి. ఈ ఘటనలో పైలట్‌ చనిపోయాడు. భారీ క్షిపణులను, డ్రోన్లను రష్యా వరుసగా ప్రయోగించిందని అందులో నాలుగింటిని ఎఫ్‌-16 ఫైటర్లతో కూల్చివేశామని.. అదే సమయంలో ఒక ఎఫ్‌-16 కూలిపోయిందని కీవ్‌ సైన్యం తెలిపింది.

ఉక్రెయిన్‌ ఇప్పటివరకు సోవియెట్‌ కాలం నాటి యుద్ధవిమానాలను ఉపయోగిస్తున్నది. రష్యా దగ్గర అత్యాధునిక యుద్ధ విమానాలు ఉండటంతో కీవ్‌ విజ్ఞప్తి మేరకు పాశ్చాత్య దేశాలు 60 విమానాలు అందించడానికి అంగీకరించాయి. ఇందులో భాగంగా ఇప్పటివరకు 6 యుద్ధ విమానాలను ఉక్రెయిన్‌కు డెలివరీ చేశాయి.

మరోవైపు గురువారం ఉక్రెయిన్‌పై రష్యా దళాలు 5 మిసైల్స్‌, 74 షాహిద్‌ డ్రోన్లతో విరుచుకుపడింది. వాటిలో రెండు క్షిపణులను ఉక్రెయిన్‌ గగన తలంలోనే కూల్చివేసింది. రష్యా ప్రాంతాలైన రోస్టోవ్‌, కిరోవ్‌ ప్రాంతాల్లో చమురు గిడ్డంగులపై ఉక్రెయిన్‌ దాడులు చేసినట్లు క్రెమ్లిన్‌ వెల్లడించింది. క్రిమియాపై దాడులకు యత్నించగా తిప్పికొట్టినట్లు ప్రకటన విడుదల చేసింది.