మరోసారి తడబడిన బైడెన్‌

అమెరికా అధ్యక్షడు బైడెన్‌ మరోసారి తడబడినారు. అమెరికా ఉపాధ్యక్షుడు ట్రంప్‌, ఉక్రెయిన్‌ అధ్యక్షుడు పుతిన్‌ అంటూ.. ఆయన చేసిన వ్యాఖ్యలు తీవ్ర చర్చనీయాంశంగా మారాయి. రెండోసారి అధ్యక్ష బరిలో నిలిచిన బైడెన్‌ పై సొంతపార్టీ, విపక్షాల నుంచి విమర్శలు వ్యక్తమవుతున్నాయి. ఈ తరుణంలో ఈ ఘటన చోటు చేసుకున్నది.

నాటో దేశాల వార్షిక సదస్సు తర్వాత బైడెన్‌ మీడియాతో మాట్లాడారు. ఈ సందర్భంగా అధ్యక్ష రేసు నుంచి మీరు వైదొలిగితే కమలాహారీస్‌ ట్రంప్‌ను ఓడించగలరని భావిస్తున్నారా అని విలేకర్లు అడిగిన ప్రశ్నకు ఆయన బదులిచ్చారు.

అధ్యక్షుడిగా పనిచేసే అర్హత ఉపాధ్యాక్షుడు ట్రంప్‌నకు లేకుంటే ఆయనను ఆ పదివికి ఎంపిక చేసే వాడినే కాదన్నారు. ఉపాధ్యక్షురాలు కమలా హారీస్‌ బదులు ట్రంప్‌ అన్నారు. మీడియా సమావేశానికి ముందు నాటో సభ్య దేశాల ప్రతినిధులకు ఉక్రెయిన్‌ అధ్యక్షుడు జెలెన్‌ స్కీని పరిచయం చేసిన బైడెన్‌ ఆ సమయంలో ఆయనను ఆహ్వానిస్తూ అధ్యక్షుడు పుతిన్‌ అని సంభోదించారు. దీంతో అక్కడివారంతా ఒక్కసారిగా అవాక్కాయ్యారు జెలెన్‌ స్కీ మాత్రం నవ్వుతూ.. ఈ విషయాన్ని తేలిగ్గా తీసుకున్నారు. సమావేశం అనంతరం వివిధ దేశాల నేతలు బైడెన్‌కు మద్దతుగా నిలిచారు. అప్పుడప్పుడు ఇలాంటి చిన్నచిన్న పొరపాట్లు సహజమే అన్నారు.